Vitaverk og sjóuppmerking á føroyskum hondum

Málsøkið ‘vitaverk og sjóuppmerking’ er nú komið á føroyskar hendur, og hetta varð markerað við hátíðarhaldi á Sjóvinnustýrinum á Giljanesi í gjár.

Samstundis varð samstarvsavtala undirskrivað við danska Søfartsstyrelsen, sum higartil hevur umsitið økið, sum setir karmarnar um samstarvið millum Sjóvinnustýrið og Søfartsstyrelsen framyvir.

Høgni Hoydal, landsstýrismaður við uttanríkis- og vinnumálum, flutti fram røðu. Eisini søgdu Andreas Norseth, stjóri í danska Søfartsstyrelsen og Hans Johannes á Brúgv, stjóri í Sjóvinnustýrinum, nøkur orð.

Sjóvinnustýrið hevur stovnað nýggja deild – Vitaverk og sjóuppmerking – har Asbjørn Østerø er deildarleiðari. Afturat honum er Georg Jakobsen, sum er teknikari. Eisini verða 10 vitapassarar knýttir at Sjóvinnustýrinum sum tímalønt starvsfólk.

Sjóvinnustýrið hevur yvirtikið øll hesi starvsfólk frá Søfartsstyrelsen, skrivar Sjóvinnustýrið á heimasíðuni.

- Vit gleða okkum at fara í gongd við hetta nýggja arbeiðsøkið og lova at røkja tað væl, segði Hans Johannes á Brúgv millum annað í røðu síni. 

Avtalan verður undirskrivað (Mynd: fma.fo)