Trý tvíburðapør á Vinnuháskúlanum

Tað er ikki løgið um eitt sindur av hurlivasa verður á Vinnuháskúlanum framyvir. Kanska serliga millum lærararnar, sum møguliga halda, at tað er farið at bila við sjónini.

Tí á Vinnuháskúlanum lesa í løtuni trý tvíburðapør. Skúlin skrivar á sínari Facebooksíðu, at hetta má vera fyrstu ferð í søguni hjá skúlanum.

Tvey av teimum trimum tvíburðapørunum eru eineggjaðir tvíburðar.

Tvíburðarnir eru: Hans Jákup & Elias, synir Lindu Lervig og Jóhannes Mikkelsen (Syðrugøta), Martin og Beinir, synir Heidi og Una Nón (Fuglafjørður) og Kaj og Heri, synir Petru og Johnni Jacobsen (Klaksvík).

Hans Jákup, Elias, Martin, Beinir og Heri lesa til maskinmeistara, meðan Kaj lesur til Skipsførara.

Spurdir um, hví allir valdu at fara á Vinnuháskúlan at nema sær útbúgving, søgdu teir, at Vinnuháskúlin er ein góður skúli, sum bjóðar næmingunum spennandi útbúgvingar, sum geva góðar arbeiðsmøguleikar á sjógvi og landi, skrivar skúlin á Facebook.

Um 200 næmingar lesa á Vinnuháskúlanum.