Írsk skip landað havgølt í Fuglafirði

Hjá Havsbrún í Fuglafirði landa skipini annað enn svartkjaft í hesum døgum.

Fleiri landingar hava seinastu tíðina verið í Fuglafirði, og fleiri eru ávegis.

Eitt írskt par, sum ikki er ókent í Fuglafirði, hevur júst landað 2700 tons av havgølti til Havsbrún, sum teir hava fiskað í ES sjógvi.

Talan er um írsku uppsjóvarskipini Father Mckee  og Brendelen, sum hava landað fleiri lastir í Fuglafirði seinastu árini, og árið í ár er einki undantak.

Hjá Havsbrún verður veiðan framleidd til mjøl og lýsi, og síðan til fóður.

Seinni í kvøld kemur Jupiter á Fuglafjørð við 2000 tonsum av svartkjafti, sum teir skulu landa til Havsbrún.

Teir hava fiskað svartkjaftin í føroyskum sjógvi.

Fríggjadagin landaði Arctic Voyager 1900 tons, sum teir eisini hava fiskað í føroyskum sjógvi.