Uttanlands

Gitte Henning skjótt undir føroyskt flagg

Størsta uppsjóvarskipið í Danmark, verður skjótt skrásett í føroyska flotanum

Gitte Henning sæst her útfyri Skagen ávegis til fiskiskap fyri seinastu ferð áðrenn skipið verður leigað til Føroyar

Gitte Henning sæst her útfyri Skagen ávegis til fiskiskap fyri seinastu ferð áðrenn skipið verður leigað til Føroyar

2019-08-22 06:47 Author image
Kiran Jóanesarson
placeholder

Gitte Henning, sum er størsta uppsjóvarskipið í Danmark, loysti í gjárkvøldi úr Skagen, og setti kós móti sildafeltinum fyri seinastu ferð áðrenn skipið verður skrásett í Føroyum.

Gitte Henning er leigað til Varðan, sum skal brúka skipið at fiska fyri Trónda í Gøtu, sum skal hava nýggj gear.

Arbeiðið er mett at taka umleið eitt ár, og skipið hevur kvotur, sum skulu fiskast. Talan er um makrel, sild og svartkjaft.

Varðin upplýsti á heimasíðu síni fyri einum mánaða síðan, at felagið hevði leitað eftir einum hóskandi skipi, sum kundi fiska fyri Trónd í Gøtu meðan skipið bleiv umvælt.

Hóast Varðin í Gøtu eigur Høgaklett, sum liggur í Søldafirði, so valdi reiðaríið, at leiga sær eitt nýtt skip, soleiðis at góðskan á veiðuni er frystafloks, sum er kravið hjá kundunum hjá felagnum.

Varðin hevði hugt eftir nøkrum skipum, sum felagið kundi leiga, og valið fall á danska uppsjóvarskipið Gitte Henning, sum varð latið reiðarínum í Skagen í fjør.

Í gjárkvøldið skrivaði reiðarin, Henning Kjeldsen, á Facebook, at skipið hevði loyst fyri seinastu ferð áðrenn skipið verður skrásett undir føroyskum flaggi.

Varðin hevur leigað skipið í eitt gott ár, og hevur tryggjað sær forkeypsrættin uppá Gitte Henning, um felagið ynskir at keypa skipið.

Gitte Henning lastar 3600 tons, meðan Tróndur í Gøtu lastar munandi minni - 2700 tons. 

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder