Fleiri skip farin á lodnuveiðu í íslendskum sjógvi

Finnur Fríði hevur landað fyrstu lastina av lodnu í Føroyum, og uppsjóvarskipið er farið aftur til fiskiskap eftir lodnu í íslendskum sjógvi.

Gøtunes, sum eisini hoyrir til Varðan, hevur eisini sett kós móti lodnufeltinum og Christian í Grótinum liggur á Ánunum og riggar seg til fiskiskap eftir lodnu.

Finnur Fríði á lodnuveiðu í íslendskum sjógvi (Savnsmynd: Sigmund av Teigum)

Gøtunes hevur eina kvotu á 1.574 tons eins og Finnur Fríði, meðan Christian í Grótinum hevur eitt vet meira - 1.719 tons.

Uppsjóvarskipini fiska lodnu við nót og á leiðini, har skipini royna eru eisini íslendsk og grønlendsk skip.

Christian í Grótinum liggur í Ánunum og riggar seg til at fara á lodnuveiðu (Savnsmynd: Sverri Egholm)

Umframt Gøtunes, Finn Fríða og Christian í Grótinum so hava eisini Norðborg, Tróndur í Gøtu og Høgaberg fingið lodnukvotu í ár.