Bakkanes er eitt gott skip

- Eg haldi hetta er eitt gott og væl hildið skip. Tað er bygt í Norra í 2006, er 73 metrar langt og 16.6 metrar breitt og hevur tveir MAK motorar á 2400 KW hvør, sigur maskinstjórin á Bakkanesi, Sveinur Zachariasen.

- Tað var felagið “Eidsvik” í Norra sum átti skipið, sum hevur verið tænastuskip í oljuvinnuni. Síðstu 10 mánaðirnar hevur tað ligið, vegna lítla virksemi sum er í oljuvinnuni, sigur hann.

Sveinur Zachariasen (Mynd: Føroyska Sjómansmissiónin)

- Nú skal skipasmiðjan Mest umbyggja Bakkanes til tænastuskip í aluvinnuni. Tað kemur óivað at arbeiða mest í alivinnuni hjá Bakkafrosti í Skotlandi. Vit skulu hava somu avlúsingarskipan, sum nýliga er sett í Martin, sum nærum er systirskip til hetta skipið. Harafturat skulu vit hava fýra kranar á dekkinum, til ymisku arbeiðini í aluvinnuni, sigur Sveinur Zachariasen.

Sum skilst vera níggju mans við og tvær manningar koma at hoyra til skipið.

Gongst eftir ætlan verður Bakkanes klárur hálvan august.

Føroyska sjómansmissiónin ynskir Bakkafrost til lukku og Guds signing við Bakkanes.