Aspirantskipanin skal gerast betri

Landsstýrismaðurin í barna- og útbúgvingarmálum ætlar at betra um fíggjarligu fortreytirnar hjá teimum, ið taka aspirantútbúgving, og eitt lógaruppskot um hetta er sent í hoyring, skrivar Barna- og útbúgvingarmálaráðið.

Lógaruppskotið leggur upp til, at landsstýrisfólkið fær heimild til at seta skipan í verk, har reiðaríir, ið hava aspirantar í starvsvenjing og rinda teimum løn, kunnu fáa eitt lutvíst endurgjald fyri at veita aspirantum løn, meðan teir eru umborð.

Skipanin kemur ætlandi at fevna um bæði maskin- og navigatørútbúgvingarnar.

Lógaruppskotið er grundað á eitt tilmæli um batar í aspirantskipanini, ið arbeiðsbólkur lat landsstýrismanninum. Í arbeiðsbólkinum vóru umboð fyri vinnuna, fakfeløgini, skúla og myndugleikar.

Ætlanin er, at skipanin skal líkjast donsku aspirantskipanini, har reiðaríini rinda aspirantum løn, meðan teir eru umborð og síðani fáa eitt fast endurgjald frá landinum. Endamálið við hesum er, at fleiri skulu velja føroysku skipanina, og at vit skulu vera kappingarfør við donsku skipanina, skrivar Barna- og útbúgvingarmálaráðið.

Lógaruppskotið sæst her. Freistin at gera viðmerkingar er 26. desember.