Aliflotin hevur avbjóðingar við trygdini

Sjóvinnusstýrið hevur gjørt eina kanning av bátunum í alivinnuni. Orsøkin til átakið er hendingin, tá alibátur sakk út fyri Porkerisnes í fjør

Krosssteinur, sum sakk út fyri Porkerisnesi í 2021 (Savnsmynd)

Krosssteinur, sum sakk út fyri Porkerisnesi í 2021 (Savnsmynd)

2022-08-11 11:13 Author image
Ingi Samuelsen
placeholder

Flotin av føroyskum alibátum hevur ávísar avbjóðingar við trygdini. Serliga er tað tættleiki á skrokkum, brandútgerð, spuli- og lendipumpur, sum ikki liva upp til krøvini.

Tað vísir ein kanning, sum Sjóvinnustýrið hevur gjørt av føroyska flotanum av alibátum, harav teir allarflestu eru tvíkiljur.

Upprunin til hetta átakið hjá Sjóvinnustýrinum er hendingin 8. apríl 2021, tá alibáturin Krosssteinur sakk, hálvan fjórðing úr Porkerisnesi. Tveir mans vóru við, og báðir vórðu tíbetur bjargaðir í annan bát.

Krossteinur liggur framvegis á havsins botni og tí kann orsøkin til at báturin sakk ikki staðfestast við vissu. Kanningarnar hjá Sjóvinnustýrinum vísa ikki á eina ávísa ella fleiri beinleiðis orsøkir til at Krossteinur sakk, men kanningin gevur ábendingar um, hvat kann vera hent, og Sjóvinnustýrið avgjørdi tí at seta eitt átak í verk fyri at finna útav hvussu støðan er umborð á føroysku alibátunum.

[object Object]
Tilvildarlig mynd (Mynd: Bakkafrost)

28 alibátar vóru við í kanningini í vár og í summar. Hetta svarar til 34 prosent av samlaða talinum av alibátum í Føroyum. Bátar á flestu aliøkjum hjá fyritøkunum Luna (Hiddenfjord), Mowi og Bakkafrost eru við í kanningini.

Kanningin vísir, at størstu avbjóðingar eru á økinum, skrokktættleiki, brand, spuli og lensipumpur. Sjóvinnustýrið hevur arbeitt við hesum avbjóðingunum, og fyri at vinnan skal fáa eina greiða ábending um hvørji krøvini eru, er ein sokallaða javnvirda (ekvivalenta) loysn fyri brand, spuli og lensipumpir gjørd, ið kann nýtast ístaðin fyri galdandi reglur á økinum. Ein ekvivalent loysn er ein loysn ið er minst líka trygg og góð sum galdandi reglukrøv.

Í samband við skrokktættleiki hevur Sjóvinnustýrið víst á hvussu rør- og kaðalgjøgnumføringar eiga at verða gjørdar sambært reglum á økinum, og at tað eru fleiri góðkendar loysnir á marknaðinum til endamálið.

Sambært kanningini eru alarmar á útstoytskipanirnar ikki nøktandi, og er tað oftast hitafølari í manglar á útstoytskipanini. Har tað er ein partur av ávaringarskipanini, eigur alarmur at vera settur í skjótast til ber.

Útbúgving av manning gongur rætta vegin, tó ikki heilt uppá pláss. Førleikarnir til at brúka eldávaringar og eldsløkkingskipanir kundu eisini veri betri.

Tað er at frøast um, at bjargingarútgerð, eldsløkki og ávaringarskipanir er í lagi í allar flestu bátunum.

Fyri at røkka málinum um at allir alibátar lúka krøvini fyri omanfyri nevndu øki, hevur Sjóvinnustýrið sett eina skiftistíð fyri eigarar og manning um at fáa viðurskiftini í rættlag sum skjótast, og í seinasta lagi við komandi høvuðssýn, stendur millum annað at lesa í frágreiðingini.

Sí alla frágreiðingina her 

Sjóvanlukkufrágreiðingin um Krossstein sæst her   

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder