Sáttmálin millum Maskinmeistarafelagið og Reiðarafelagið longdur við týðandi broytingum

Maskinmeistarafelagið og Føroya Reiðarafelag hava gjørt semju um at leingja verandi sáttmála fyri fiskiskipini fram til 1. apríl, tó við nøkrum týðandi broytingum.

Við semjuni eru sjey broytingar gjørdar í sjálvum sáttmálatekstinum, umframt at serreglur eru gjørdar fyri skip í bólki 2 – trolarar – sum eru útgjørd við skipanum til vaktfrí maskinrúm og bara hava ein maskinmeistara. Her skal heitið hjá maskinmeistaranum vera maskinstjóri.

Við semjuni verður tað m.a. eitt krav, at maskinmeistari, ið verður settur til eftirlitsarbeiði í samband við nýbygging ella umvælingar- og umbyggingararbeiði skal gera seravtalu við reiðaran, áðrenn eftirlitsarbeiðið verður gjørt.

Eisini verður betur nágreinað í sáttmálanum, at arbeiðslønin hjá maskinmeistarum, sum arbeiða umborð millum túrar, bæði er pensjónsgevandi, og at frítíðarløn uppá 12 prosent skal roknast oman á hana, skrivar heimasíðan hjá Maskinmeistarafelagnum.