Størsti parturin av uppsjóvarflotanum farin í summarfrí

Fleiri av uppsjóvarskipunum hava nú lagt fyri summarið, og fara aftur til fiskiskap tá ið summarið er farið at halla.

Á Runavík liggja Gøtunes, Finnur Fríði, Høgaberg og Ango.

Trý tey fyrstu skipini bíða nú eftir at tey skulu á beding í Føroyum og í Danmark, har ymiskt viðlíkahald skal gerast meðan Ango bíðar eftir at alt kemur uppá pláss, og verður selt av landinum.

Á Hulki liggja uppsjóvarskipini Tróndur í Gøtu og Birita. 

Tróndur í Gøtu skal á beding hjá Mest í Føroyum seinni í summar, og Birita hevur fiskað so at siga alla kvotuna fyri í ár. 

Nøkur uppsjóvarskip eru tó framvegis til fiskiskap, men sum skilst eru eisini tey skipini við at verða liðug við kvoturnar og fara síðani í summarfrí.