Reydligur sjógvur kring oyggjarnar

Seinastu vikurnar hevur Havstovan fingið fráboðanar um reydligan sjógv ymsa staðni undir landi. Tey hava fingið nøkur sýni, og greiningar vísa, at talan er um kopepodin Temora longicornis.

Temora er ein miðalstórur kopepodur, sum er vanligur á Landgrunninum um summarið. Hon verður etin av millum annað fiskalarvum og øðrum smáfiski, men hvønn týdning hon hevur í føðiketuni á Landgrunninum, vita tey ikki heilt.

Temora longicornis. (Mynd: Durita Sørensen)

Í løtuni er nógvur gróður, og hitin í sjónum er óvanliga høgur. Hesi viðurskifti kunnu hava ávirkan á vøkstur og útbreiðslu av Temora, men nærri kanningar skulu til fyri at skilja orsøkirnar til tær stóru nøgdirnar, vit síggja í løtuni.

Havstovan