Makrelgýting við Føroyar kannað

Í jústfarnu viku varð Jákup Sverri liðugur at kanna makrelgýting á leiðunum kring Føroyar.

Mest av makreleggum vóru í økjunum móti evropisku hellingini eystan fyri Føroyar, og í Bankarennuni og út av Landgrunninum vestanfyri (Mynd 1).

Makrelgýting verður kannað triðja hvørt ár og í kanningarøkinum hjá Jákup Sverra vóru í ár umleið 25% færri makrelegg enn í 2022.

Mynd 1. Nøgdin av makreleggum á hvørji støð, avmyndað sum ljósareyðir sirklar. Støðir við ongum makreleggum eru vístar sum ‘x’ og trolstøðir eru vístar sum bláir ferhyrningar. 2000 m, 1000 m, 500 m og 200 m dýpdarlinjur eru vístar við gráum linjum og landamørk við brúnligum linjum. Litirnir á myndini vísa miðal vatnskorpuhita, mátað við fylgisveini 15.-18. maj 2025.

Mynd 2. Prøvi við makreleggum. Makreleggini eru 1.1-1.3 mm í diametur, og alt eftir hvussu heitur sjógvurin er, tekur tað 1-2 vikur fyri tey at klekjast. Á myndini síggjast bæði nýgýtt egg (1), egg, har larvan byrjar at síggjast (2) og egg við nærum klekingarbúnum larvum (3).

Kanningin hjá Jákup Sverra er partur av felagsskanningum, sum verða gjørdar triðja hvørt ár í havøkinum frá Biskayavíkini og norður til Føroyar. Hetta  í tíðarskeiðinum frá februar til juli.

Umframt Føroyar luttaka Danmark, Niðurlond, Írland, Noreg, Portugal, Skotland, Spania, Stóra Bretland og Týskland.