Innanlands

Kokkar frøast um prima rávøru

Magnus Heinason hevði eitt rimmar hál á seinasta royndartúri sínum á Føroyabanka, annars var talan um slaka veiðu av toski

Kokkarnir Janus Einar Sørensen og Teitur Christensen skoða rávøruna í morgun (Mynd: Johan Mortensen)

Kokkarnir Janus Einar Sørensen og Teitur Christensen skoða rávøruna í morgun (Mynd: Johan Mortensen)

2021-03-24 12:22 Author image
Ingi Samuelsen
placeholder

Tað er ikki heilt vanligt at síggja kokkarnar á fínaru matstovunum í Havn við bryggjukantin, tá bátar koma inn at avreiða.

Men tað hendi í morgun, tá gamla havrannsóknarskipið Magnus Heinason kom á Havnina eftir túrin á Føroyabanka.

Føroyabanki er stongdur fyri veiðu, men tvær ferðir um árið, á vári og á heysti, fer rannsóknarskipið hjá Havstovuni út á Bankan eg gera nøkur royndarhál eftir einum ávísum mynstri, ið verður endurtikið hvørja ferð. Hetta fyri at fáa eina mynd av, hvussu støðan hjá stovninum er.

Ætlanin var at nýggja havrannsóknarskipið, Jákup Sverri, skuldi gera túrin hesaferð, men orsaka av trupulleikum við skrúvuni, varð Magnus riggaður til enn einaferð at gera túrin á Bankan.

Undan túrinum høvdu tríggjar matstovur tryggjað sær lut í veiðini, so at tær kunnu borðreiða við feskum bankatoski komandi dagarnar. Matstovurnar eru Barbara Fishhouse, Húsagarður á Hotel Brandan og Hallartún á Hilton Garden Inn.

Kokkarnir á Barbaru og Húsagarði, ávikavist Teitur Christensen og Janus Einar Sørensen vóru komnir, tá Magnus í morgun byrjaði at avreiða til landingarstøðina hjá Barðinum á Vestaru bryggju í Havn.

Matstovurnar høvdu biðið um 30 stórar og góðar toskar hvør, umframt rogn og nakað av hýsu. Ætlanin var at fáa høgguslokk eisini, men hetta kundi Magnus ikki veita, tí teir fingu ongan høgguslokk.

Sum skilst lótu kokkarnir sera væl at góðskuni á stóra og ljósa toskinum av Føroyabanka.

[object Object](Mynd: Johan Mortensen)

Tað mesta í einum háli
Sum skilst gav yvirlitstrolingin ikki nakra greiða ábending um støðuna hjá toskastovninum á Føroyabanka, tí burtursæð frá tí eina hálinum, var ikki so nógvur toskur at fáa.

Hetta eina tóvið var fult trol, sambært Kringvarpinum fimm tons av stórum og feitum toski.

Talan var um gýtingarkláran tosk, og mett verður, at Magnus hevur rakt ein stima av gýtingartoski, ið hevur stúvað seg saman, í hesum eina hálinum.

Upptøkur frá fonginum síggjast í hesum innslagnum í Degi og Viku

24 krónur kilo fyri besta toskin
Portalurin skilir á lagnum, at saltfiskavirkið Vaðhorn á Strondum hevur keypt allan toskin frá Magnusi, burtursæð frá teimum 90 toskunum, sum matstovurnar fingu.

Veiðan varð seld á telefonuppboðssølu hjá Fiskamarknaði Føroya í morgun. Magnus hevði 4.200 kilo av prima toski, kallaður Toskur1, fyri 24 krónur kilo í miðal. Hetta er sami prísur, sum Toskur1 er seldur fyri seinastu dagarnar.

Harafturat vóru 600 kilo av Toski2 fyri 23 krónur kilo, 200 kilo av Toski3 fyri 19 krónur og 50 kilo av Toski4 fyri 13 krónur kiloð.

Harafturat fóru 800 kilo av toskarogni fyri 10 krónur, 9.650 krónur av hýsu fyri 8,97 krónur í miðal, 500 kilo av upsa fyri 7 krónur og 200 kilo av longu fyri 8 krónur kiloð. 

[object Object]
(Mynd: Johan Mortensen)

placeholder
placeholder