Keypa Jupiter til Klaksvíkar

Christian í Grótinum-samtakið hevur gjørt avtalu við eigararnar av uppsjóvarskipinum Jupiter um keyp av skipi og kvotunum.

Sáttmálin er ikki undirskrivaður, men sambært Jan Petersen, stjóri í Christian í Grótinum-samtakinum, er avtalan næstan komin uppá pláss. Tað upplýsir hann fyri útvarpinum.

Jupiter verður sostatt heimahoyrandi í Klaksvík, men tað er fyri kvoturnar, at reiðaríið keypir skipið.

Við dagsins kvotum kann Jupiter fiska umleið 9.300 tons av svartkjafti, 1.500 tons av makreli og umleið 1.100 tons av norðhavs- og heystgýtandi sild í ár. 

Jupiter verður helst selt tá tíðin er tann rætta, sigur Jan Petersen, stjóri í Christian í Grótinum-samtakinum.