Hiddenfjord fingið krevjandi góðkening

Alifyritøkan Hiddenfjord við høvuðsskrivstovu í Sørvági, hevur nú fingið fulla sokallaða BAP-váttan eftir at eisini smoltstøðin Fútaklettur er vorðin góðkend av hesi serligu sertificering.

BAP stendur fyri Best Aquaculture Practice. Við hesi váttanini hevur fyri tøkan nú fingið ovastu góðkenning, fýra stjørnur, skriva altjóða miðlar, so sum The Fish Site og Fish Farmer Magazine.

Henda BAP sertifiseringin er ment av Global Seafood Alliance, hvørs endamál er at menna umhvørvisvinarliga og sosialt ábyrgdarfulla fiski- og skeljadjóravinnu.

- Í okkara samskifti við samstarvsfelagar hava vit skilt, at BAP góðkenningin er ein hornasteinur fyri at skipa laksaframleiðslu á ovasta støði, sigur Óli Hansen, søluleiðari hjá Hiddenfjord í tíðindaskrivi í sambandi við góðkenningina.

- At fáa ta fjórðu stjørnuna er ikki bert eitt avrik, men ein vitnisburður um okkara áhaldandi stremban eftir bestu góðsku og burðardygd. Vit síggja fram til at deila hesi úrslit við okkara kundum og tryggja, at vit fáa gagn av okkara íkasti fyri burðardyggari laksaaling, leggur Óli Hansen afturat.

Hiddenfjord leggur seg eftir at framleiða dygdarvørur av laksi, herundir heilan feskan laks, fesk laksafløk umframt fryst høvd, ryggir og avskurðir alt uttan at brúka hormonir ella antibiotika í framleiðsluni.

- Tað hevur verið ein hugtakandi ferð, sum Hiddenfjord er farin ígjøgnum. Tey pliktaðu seg til fýra-stjørnaðu treytirnar frá byrjan av, og løgdu størt arbeiði í at fáa verkætlanina gjøgnumførda. Eg veit, at øll í fyritøkuni eru errin av avrikinum, sigur Iain Shone, stjóri fyri evropeiska partin av Global Seafood Alliance.